曼聯黑仔再添3傷兵　明奈最大鑊

曼聯開季成績低迷，而且屋漏偏逢連夜雨，周日(29日)主場0比3輸畀熱刺外，仲要增添3名傷兵，其中英格蘭中場明奈疑似拉傷大腿，最令球迷擔心。

曼聯對熱刺前，中堅哈利馬古尼報稱喺操練撞傷，結果連大軍名單都入唔到，傷勢未明。比賽中當般奴費南迪斯拎紅牌嗰陣，同一時間明奈亦喺冇碰撞情況下，突然按住大腿底坐喺地上，疑似拉傷，要即時由美臣蒙特入替。最慘情係，美臣蒙特亦喺比賽尾段「撞爆頭」要退下火線。

美臣蒙特返更衣室為傷口縫針後，應該冇乜大礙，而哈利馬古尼據報傷勢亦唔嚴重，只有明奈疑似拉傷大腿最令人擔心。坦哈格賽後表示：「呢一刻我答唔到(明奈受傷情況)，一個球員喺半場前都頂唔到要換離場，肯定係令人擔心。」