曼联黑仔再添3伤兵　明奈最大镬

曼联开季成绩低迷，而且屋漏偏逢连夜雨，周日(29日)主场0比3输畀热刺外，仲要增添3名伤兵，其中英格兰中场明奈疑似拉伤大腿，最令球迷担心。

曼联对热刺前，中坚哈利马古尼报称喺操练撞伤，结果连大军名单都入唔到，伤势未明。比赛中当般奴费南迪斯拎红牌嗰阵，同一时间明奈亦喺冇碰撞情况下，突然按住大腿底坐喺地上，疑似拉伤，要即时由美臣蒙特入替。最惨情系，美臣蒙特亦喺比赛尾段“撞爆头”要退下火线。

美臣蒙特返更衣室为伤口缝针后，应该冇乜大碍，而哈利马古尼据报伤势亦唔严重，只有明奈疑似拉伤大腿最令人担心。坦哈格赛后表示：“呢一刻我答唔到(明奈受伤情况)，一个球员喺半场前都顶唔到要换离场，肯定系令人担心。”