随“黄黑军团”闯亚冠舞台　周子谦惊喜18岁

两年前首度亮相港超联，今季前获联赛盟主理文招手，短短加盟一个月间，18岁后卫周子谦（Tim）已获“黄黑军团”委以重任，于各项赛事担正；由亚运代表到今年首度征召成为“大港脚”，Tim的近期表现可谓惊喜不断，这位理文新力军将带着拼劲勇闯亚洲赛舞台，令球迷倍感期待。

上月“亚冠杯2”分组赛对阵越南V1球队南定FC正选上阵，踢足90分钟的周子谦坦言当时紧张又期待：“始终以前未踢过呢类型嘅亚洲赛，亦都系第一次以理文球员身份担正，多谢教练畀机会同信任我之馀，个心情都有少少紧张。我觉得自己表现都算得上合格，当然整体可以再做好啲，要学识点样应对失误，避免再畀对手搵到机会进攻。嚟紧去新加坡踢第二场分组赛，上年喺U22鱼尾狮杯我都有踢过同一个场，会比较熟悉同易啲习惯个仿真草场地，呢个经验相信对备战都会有帮助。”

作为“亚冠杯2”阵中最年轻的球员，Tim形容队友实力水准强劲，在他们身上获益匪浅：“理文有好多有名气嘅外援，而且大部分本地球员都系‘大港脚’，每日同队友练波，无论体能、对抗性、决策力、集中度、速度各方面都睇到有进步，自己落场都Sharp咗唔少，佢哋会带动我想做得更好，所以好开心可以喺大球会踢波，感觉上个环境氛围激发到球员成长。”

职业生涯只开始两年左右，Tim已有幸尝过欧洲足球的滋味。2023年的初夏，一个意想不到的机遇降临，Tim凭港会七人赛的数分钟表现，获苏超豪门格拉斯哥流浪的教练青睐：“喺上年嘅Soccer Seven，嗰阵时我有份代表港会落场踢，对手系格拉斯哥流浪，完场之后对面个教练走嚟邀请我一齐去食饭，跟住我哋晏昼就去咗港会餐厅饮咖啡，坐低倾阵计，佢就问我有冇兴趣去试脚，感受嗰边嘅水平，倾倾下就夹到个时间，成件事都几random。我嗰日都只系踢咗7分钟，当时都发挥得算okay，可能就系咁畀个教练留意到我，自己真系冇谂过会有咁突如其来嘅机会，屋企人知道之后都有啲惊讶，讲笑问‘点解拣中咗你嘅？’，最后趁圣诞节有假期，唔使返学就飞过去试脚。”

在港会前主教练东尼咸美顿的安排下，他12月远赴苏格兰试脚，两星期的旅程让这位小将感受到本地与欧洲青年军之间的差异：“一开始我系跟U18，感受到苏格兰同香港青年军心态上嘅分别，本身苏超竞争激烈，班U18离队之后就好难再踢番波，好多青年军付出所有青春畀足球，都只系想争取份合约，如果无得踢可能就系去地盘打工。冇退路之下，佢哋每个球员都好有上进心，对待训练嘅心态上会认真得多。”

试脚之旅的途中，格拉斯哥流浪的教练更给予Tim与B队跟操的机会，令他大开眼界：“相差最远嘅肯定系训练强度上，B队嗰班系真系职业球员，每位球员都有突出嘅优点、风格特质等等，而且欧洲人身型上嘅优势、对抗性都更胜一筹，都难免会有比较，希望自己可以专注钻研踢法，学吓点样成为独当一面嘅球员，进步到另一个层次水平。”

Tim亦大赞格拉斯哥流浪的球员毫无架子，试脚期间，球星达华尼亚（James Tavernier）更主动与他攀谈：“嗰度比较少亚裔面孔嘅球员，达华尼亚就主动嚟问我打咩位、点解会喺度之类，佢好乐意同啲后生球员接触交流，会系走廊同我哋握手打招呼，成个氛围好似大家庭咁，其实好鼓励到班青年军，亦都畀我感受到前后辈之间嘅团结，自己好欣赏呢种球队文化。”

【周子谦档案】

出生日期：2006年3月11日（18岁）

身高：1米83

司职：右闸、中坚

球衣号码：2

现效力球队：理文

提早分配时间平衡足球与学业

与所有的香港中学生一样，目前就读拔萃男书院的Tim，同样要面对成绩的压力，平衡踢波与学业，就成为他的一大课题：“上季试过凌晨两三点做完功课，第二日练波或者踢比赛就会攰啲，虽然体力上比较吃力，我都会鞭策自己踢波要专心，返学就要认真上堂，Hea住咁样返学就冇乜意思，我自己想继续踢落去，所以今季就尽量提早分配时间，希望可以兼顾好两边。”