同安历基嘈交　奥士文尼迪比利被罚内部停赛

周三凌晨欧联焦点战阿仙奴对巴黎圣日耳门，作客嘅PSG将会让“单车”，据报该队主力射手奥士文尼迪比利因为同主教练安历基嘈交，结果以纪律问题被罚内部停赛，对阿仙奴之战除名。

法国传媒报爆料，事缘上场法甲对雷恩赛后，奥士文尼迪比利同安历基发生激烈冲突，安历基决定以纪律原因罚佢内部停赛，对阿仙奴呢场大战唔使佢踢。

27岁嘅奥士文尼迪比利效力巴塞时期有唔少纪律问题，包括练波同比赛都试过迟到，又好容易受伤，不过自从佢成婚后修心养性专心踢波，表现回复稳定，近年更系法国队同PSG嘅必然正选。

呢位法国射手今季法甲6场全部上阵，交出4球4助攻数据，对雷恩一战亦交出助攻，原本预计对阿仙奴都系必然正选，但竟然咁大胆得罪安历基，暂时要坐内部波监，如果真系唔出佢，即系变相益咗阿仙奴。