修咸頓輸波　羅素馬田快過坦哈格落鑊？

周二(1日)凌晨英超，修咸頓作客1比3輸畀般尼茅夫，今季重返英超後5場比賽只得1分，成為降班熱門。修咸頓領隊羅素馬田賽後炮轟球員比賽態度差，盛傳「聖人」有意斟樸達接手執教，羅素馬田隨時快過曼聯領隊坦哈格被炒！

修咸頓上半場兵敗如山倒，17分鐘被般尼茅夫快開罰球偷襲，法蘭斯高艾雲尼臣先開紀錄，主隊之後再由丹高奧達拉同安東尼施美安入波，半場領先3比0。修咸頓半場作出調整，下半場表現有好轉，51分鐘靠哈活比里斯破蛋，但最終仍輸1比3。

羅素馬田賽後表示：「我唔認得上半場嘅修咸頓，我覺得失望同傷心，球員唔想跑、唔想戰鬥、唔想有身體接觸，呢個係好大問題。我係團隊嘅領袖，解決問題係我嘅責任。」之前博彩公司將曼聯領隊坦哈格列為英超下個被炒領隊大熱，不過依家隨時被羅素馬田「超前」，《Football Insider》消息指，修咸頓準備向前車路士領隊樸達接觸，希望由佢代替羅素馬田執教。