巴洛迪利進軍西班牙　打救西丙弱旅

前意大利國腳巴洛迪利終於有波踢！據西班牙《Cadena Cope》報道，巴洛迪利正同西丙球隊CF英特城進行斟介，有望簽約至今季季尾，成事嘅話將會係「巴神」足球生涯首度進軍西班牙球壇。

近日有傳失業嘅巴洛迪利打算掛靴，不過34歲嘅佢仲有捧場客，CF英特城管理層已同巴洛迪利經理人安素拉奧拿接洽，提出一份到明年6月嘅合約，另加1年續約條款。

轉會唯一障礙係CF英特城目前一隊人數已滿，佢哋要先炒1名球員，先可以容納巴洛迪利註冊。CF英特城依家喺西丙排15位，深受降班威脅，球會視巴洛迪利為扭轉形勢嘅關鍵人物。

曾效力過國際米蘭、AC米蘭、曼城、利物浦等豪門嘅巴洛迪利，近年去過法國、瑞士、土耳其等聯賽搵食，今次有望首度闖西班牙球壇。