冇聲出！坦哈格教波數據衰過加利仔

曼聯喺荷蘭領隊坦哈格執教下，英超成績每況愈下，上場聯賽主場吞熱刺3蛋後，連名宿加利尼維利都指曼聯表現「嘔心」。唔少曼聯球迷為坦哈格護航，反擊加利仔嘅教練生涯都係一塌糊塗，冇資格鬧人，勢估唔到數據顯示，坦哈格近28場領軍數據，原來仲渣過加利仔！

加利仔講波就天下無敵，但佢喺2015年唯一一次做教練，出任西甲名牌華倫西亞主帥就成為笑柄，執教唔夠4個月就被炒魷，領軍28場比賽輸咗11場，包括被巴塞隆拿狂數7蛋，得失球為入39球、失38球，被諷刺為「史上最差教練」。

加利仔經常對曼聯指指點點，原本球迷都可以用「咁叻你嚟教」做反擊，但數據顯示，坦哈格最近28場曼聯比賽，有13場落敗，入35球而失咗45球，同加利仔執教生涯28場相比仲要輸一截，依家畀加利仔批評都冇聲出。