雲巴士頓轟坦哈格：曼聯冇頂級球員！

曼聯領隊坦哈格帥位危機雖然暫時解除，仲可以至少帶多兩場，但炮轟佢嘅人多不勝數，而且好多荷蘭同胞都唔放過佢，繼早前古列治寸曼聯「踢得渣」之後，「三劍俠」另一巨星雲巴士頓都發炮，指坦哈格領導嘅曼聯，一個頂級球員都冇。

雲巴士頓欣賞C朗，認為C朗同未受傷嘅佢有好多相似之處，曾勸過坦哈格要好好同C朗相處，結果坦哈格反而逼走C朗；雲巴士頓日前喺一個電視節目講曼聯話題，佢有咁嘅睇法。

雲巴士頓先講曼聯新簽嘅文路爾烏加迪：「我最近留意一名曼聯球員，佢叫烏加迪，用咗5,000萬歐元！坦哈格竟然用咁多錢買個唔算太優秀嘅球員，咁樣做太愚蠢。」

跟住雲巴士頓直接指出，曼聯現時陣中已經冇晒頂級球員：「你可以講出曼聯邊個係頂級球員嘛？每支勁旅都有幾個，拉舒福特唔得啦，般奴費南迪斯算係好啲，奧拿拿都算係，係咁多喇。」

「卡斯米路已經玩完，阿歷真度加拿祖算幾好，但佢哋冇一個可以孭重飛！」