多蒙特大炒7比1　些路迪成英國之恥

周三(2日)凌晨歐聯出現特大比數，德甲勁旅多蒙特主場以7比1大勝些路迪，前鋒卡廉艾迪耶美上半場已經完成「帽子戲法」，蘇超球隊些路迪成為近27年以來，首支喺歐洲賽上半場失5球嘅英國球隊。

開賽7分鐘，多蒙特獲得12碼，安利簡恩主射入網，雖然些路迪好快由日本國腳前田大然入波扳平，但之後慘遭「蜜蜂兵團」蹂躪，卡廉艾迪耶美獨取3球，古拉斯射入12球，多蒙特上半場領先5比1，亦令些路迪成為1997年8月歐洲盃賽冠軍盃，威爾斯球隊斯白蘭鎮之後，近27年首支喺歐洲賽上半場失5球嘅英國球隊，當年斯白蘭鎮作客羅馬尼亞球隊普格蘇爾，上半場落後5球，全場輸0比7。

些路迪今場情況亦差唔多，下半場再被古拉斯、菲歷斯尼美查攻破大門，慘敗1比7收場，多蒙特追平球隊史上歐聯最大勝仗紀錄。

另一支德甲球隊利華古遜憑邦尼菲斯下半場入波，主場以1比0擊敗AC米蘭，同多蒙特一樣2戰2勝。