歐聯奇兵又有傑作　創造100倍波膽

「歐聯奇兵」比斯特又有傑作，周三(2日)凌晨作客以4比0大勝薩爾斯堡，爆出100倍波膽，呢支法甲球隊比斯特首度參加歐聯，取得2戰2勝，成績仲好過曼城、阿仙奴、巴黎聖日耳門、巴塞隆拿等豪門，實在令人驚喜。

有121年歷史嘅比斯特上季法甲爆冷獲得季軍，歷史性首次獲得歐聯正賽入場券，上輪歐聯首場就立即贏波，以2比1擊敗格拉茨，今場仲犀利，反客為主，憑艾比達拉施馬梅開二度，加上馬迪卡馬拉、彭利拿拉治各入1球，以4比0擊敗薩爾斯堡，現時同多蒙特、利華古遜，成為暫時3支2戰全勝嘅球隊。

不過，比斯特今季聯賽成績大為退步，6場只有2勝4負，似乎想集中力量踢好歐聯，創造球壇新童話故事。