般費打甩紅牌　英超唔需要停賽

曼聯上場英超0比3不敵熱刺，隊長般奴費南迪斯因為飛剷對手占士麥迪臣，被球證卡維拿治直接出示紅牌趕出場，判決尺度引起爭議。賽後紅魔鬼提出上訴，獲英足總判勝訴，般費唔需要停賽，可以出戰周日(6日)晚英超大戰作客對阿士東維拉。

當時般奴費南迪斯腳背外側踢到占士麥迪臣，並非太粗野，但球證卡維拿治仍然向呢位葡萄牙國腳直接出示紅牌，按例需要自動停賽3場，錯過對英超對阿士東維拉、賓福特、韋斯咸。賽後般費同曼聯主帥坦哈格都認為，呢種犯規最多拎黃牌，會方亦提出上訴。

英足總發表聲明，指委員會經過檢視後，認為紅牌屬於量刑過重，予以取消，至於球證卡維拿治亦唔會受罰，將於周六(5日)及周日(6日)繼續執法英超賽事。雖然般奴費南迪斯唔需要「坐波監」，但曼聯因為球證錯判，上場踢少1人，成為痛失3分主因，實在冤枉。