名將之後！「古莊臣」倒戈車路士

車路士將於周五(4日)凌晨歐協聯主場對真特，屆時會見到「古莊臣」大名：安達古莊臣，呢位真特前鋒正係車仔昔日射手古莊臣嘅次子，佢上場比甲後備上陣2分鐘就入波，盡得爸爸「後備殺手」真傳，今場隨時可以左右大局。

冰島名宿古莊臣球員時代曾於2000至06年效力車路士，上陣263場入78球，佢有3個囝囝，同樣司職前鋒，26歲長子施雲效力挪威球隊薩普斯堡，18歲細仔丹尼爾效力瑞典勁旅馬模。

至於22歲嘅安達今夏由丹麥球隊寧比轉投真特，並於7月底比甲首次上陣就射入全場唯一入球，協助真特擊敗哥治。雖然呢位「星二代」其後陷入入球荒，但上場聯賽對奧特海維利，重拾射門鞋入波，為今場鬥車路士，打下一支強心針。

安達古莊臣喺倫敦出世，當時爸爸效力車仔，佢對「藍戰士」有一份特別感情，表示重遊舊地，可以喺史丹福橋球場比賽，覺得非常興奮，仲話到時入波，一定好有趣，似乎對於自己射術信心十足。