15年效力13隊　前曼聯神童再戰希臘

出身於曼聯青訓系統嘅一代「神童」馬捷達又轉會，正式加盟希臘球隊卓普利斯，亦係呢位33歲意大利前鋒出道15年以來，第13支效力嘅球隊，可堪稱為「球壇第一浪人」。

馬捷達2009年4月英超為曼聯一隊上陣對阿士東維拉，補時射入反勝1球，其後對新特蘭，又射入致勝1球，成為紅魔鬼奪得該季英超冠軍嘅大功臣。

當全世界以為呢位「新童」會成為曼聯鋒線希望時，點知佢只係曇花一現，上陣機會非常少，大部分時間被外借去多支球隊，2014年正式離開曼聯，加盟卡迪夫城，但都係不獲重用。

馬捷達「最成功」係2018至22年效力希臘球隊彭拿典奈高斯，上陣116場入40球，但轉投土超球隊安卡拉古庫後，又跌落谷底，上陣14次僅入1球，近日離隊重返希臘，加盟由法國名宿馬基列尼執教嘅卓普利斯，希望事業可以翻生。