馬天尼斯連環神救　威廉王子嗌到失聲

阿士東維拉喺歐聯創造歷史，主場1比0擊敗拜仁慕尼黑一仗，除咗祖漢杜蘭世界波技驚四座，阿根廷門將達米安馬天尼斯全場左飛加撲，同樣係贏波大功臣，連王儲威廉王子都喺看台上面嗌到失聲！

拜仁今場有唔少攻門，不過達米安馬天尼全場作出7次撲救，包括上半場托出米高奧利斯嘅曲墜冷箭，補時4分鐘再撲出哈利卡尼近門必入頭槌，著名維拉死忠威廉王子都喺看台上振臂高呼。

威廉王子賽後興奮表示：「我嗌到失聲，真係難以置信，42年啦！」維拉喺42年前嘅歐聯決賽擊敗拜仁封王，就喺維拉捧盃之後差唔多1個月，威廉王子先至出世。

達米安馬天尼斯賽後亦信心十足：「呢場係標誌性嘅勝利，我哋目標係以前8名身份晉級，今場嘅維拉公園係我加盟以來氣氛最熾熱嘅一場，呢支球隊不斷進步，亦係我決定留低嘅原因。」