马天尼斯连环神救　威廉王子嗌到失声

阿士东维拉喺欧联创造历史，主场1比0击败拜仁慕尼黑一仗，除咗祖汉杜兰世界波技惊四座，阿根廷门将达米安马天尼斯全场左飞加扑，同样系赢波大功臣，连王储威廉王子都喺看台上面嗌到失声！

拜仁今场有唔少攻门，不过达米安马天尼全场作出7次扑救，包括上半场托出米高奥利斯嘅曲坠冷箭，补时4分钟再扑出哈利卡尼近门必入头槌，著名维拉死忠威廉王子都喺看台上振臂高呼。

威廉王子赛后兴奋表示：“我嗌到失声，真系难以置信，42年啦！”维拉喺42年前嘅欧联决赛击败拜仁封王，就喺维拉捧杯之后差唔多1个月，威廉王子先至出世。

达米安马天尼斯赛后亦信心十足：“呢场系标志性嘅胜利，我哋目标系以前8名身份晋级，今场嘅维拉公园系我加盟以来气氛最炽热嘅一场，呢支球队不断进步，亦系我决定留低嘅原因。”