奇迹逆轉！祖記10人應戰反勝萊比錫

意甲勁旅祖雲達斯今季喺莫達執教下，開季各項賽事保持不敗，周四(3日)凌晨歐聯喺超級劣勢下，作客奇迹以3比2反勝RB萊比錫，改寫歐聯歷史。

祖雲達斯今場相當黑仔，開波唔夠15分鐘已有費達歷高加迪同尼高拉斯干沙利斯傷出，浪費兩次換人名額，30分鐘更被施斯高攻陷，半場落後0比1。祖雲達斯50分鐘由杜辛華荷域追平，點知59分鐘就有門將迪基哥里奧禁區外手球被逐，6分鐘後再輸12碼，施斯高為RB萊比錫操刀再次領先。

踢少個兼再次落後，作客嘅祖雲達斯未有放棄，68分鐘再憑杜辛華荷域遠射追平，完場前8分鐘更有法蘭斯高干斯卡奧禁區精彩過人後射入，協助祖雲達斯反勝3比2。統計顯示，祖記係歐聯史上第2隊，喺作客兼踢少1個情況下反勝嘅球隊。

祖記教練莫達賽後表示：「上半場我哋犯錯，下半場改善好多，就算10人應戰都勇往直前，呢班球員非常有勇氣，做得非常之好！」