美斯起孖！邁亞密膺美職常規賽冠軍

周四(3日)朝早美職賽事，國際邁亞密憑美斯梅開二度，作客3比2擊敗哥倫布機員，提前鎖定常規賽冠軍，呢個又叫「支持者盾」(Supporters' Shield)嘅榮譽，成為美斯進軍美國後第2個錦標。

美斯喺完半場前發威，先喺45分鐘打開紀錄，補時5分鐘再入1球，為邁亞密喺半場拎到2球優勢。主隊換邊後1分鐘閃電破蛋，但蘇亞雷斯48分鐘再為邁亞密拉開到3比1。哥倫布機員61分鐘靠12碼追番1球，令邁亞密尾段受壓，完場前6分鐘邁亞密門將哥蘭達勇救12碼，為球隊保住關鍵勝利。

美斯因為傷患困擾，今季常規賽只踢過17場，但已經取得17個聯賽入球，呢位阿根廷球王賽後表示：「我好開心，好開心我哋成功咗。季初我哋知道呢支球隊可以為冠軍戰鬥，由開季就一直領先，國際邁亞密有好多好球員，第1個目標已經達成，依家向下個目標進發。」