重修舊好？皮利斯轉軚：沙卡勁過杜古

阿仙奴名將皮利斯今年初，曾經喺節目發表「謝利美杜古好過布卡約沙卡」言論，引嚟唔少討論。不過呢位法國傳奇日前轉軚，澄清喺佢心目中，沙卡比杜古更加優秀，難怪兩人喺阿仙奴嘅歐聯後合照，寫住「再做老友」！

皮利斯年初曾經玩「翼鋒2選1」遊戲，當出現沙卡同曼城翼鋒杜古選項，皮利斯當時就揀杜古：「沙卡喺大賽仲欠缺一啲穩定同經驗，或者今季歐聯佢可以踢得更有說服力，我覺得杜古腳法、扭波同創造力更好。」

阿仙奴日前歐聯對巴黎聖日耳門，皮利斯都有入場觀戰，佢賽前就轉軚：「我早排比較沙卡同另一球員，我話另外嗰位球員喺某部份技術更好，但唔代表我覺得嗰個球員勁啲，事實上我覺得沙卡更優勢，而且佢仲係着魔法7號！」

皮利斯係前阿仙奴7號擁有者，佢賽後就喺更衣室同沙卡合照，而沙卡亦搞鬼喺社交網寫住「再做老友」，加上個笑到喊嘅emoji，意味阿仙奴兩代翼鋒重傷舊好。