紐亞被笠死否認犯錯　艾美利「早有預謀」

拜仁慕尼黑喺歐聯作客0比1不敵阿士東維拉，所失1球因為門將紐亞企得太出而被笠死，不過呢位老將就否認自己犯錯，強調企出禁區係「戰術需要」。

38歲嘅紐亞一向以腳法同組織力強見稱，經常棄關兼任清道夫幫助組織，今次被笠死後受到批評，紐亞就回應：「係人都知我場場波都咁踢，維拉個前鋒射得好，當然我可以企後2米，但呢個就係拜仁嘅踢法，我哋計算過咁去冒險，呢個係拜仁風格，不過我唔知道呢個失波後，教練會唔會有其他唔同指示。」

維拉成功「偷雞」，領隊艾美利賽後話係「早有預謀」：「我哋研究拜仁嗰陣，已經討論過紐亞嘅位置會好出，我知道祖漢杜蘭會射門，因為佢腦入面已經覺得有可能入到紐亞波。」