比蘭莊臣連續5場入波　熱刺重現「寸王盛世」

周五(4日)凌晨歐霸盃，熱刺作客以2比1擊敗費倫斯華路士，翼鋒比蘭莊臣後備上陣又射入1球，連續5場比賽有波入，熱刺亦繼2021年3月「寸王」摩連奴執教時期之後，相距3年半，再次取得各項賽事5連勝。

熱刺主帥普斯迪高路今場輪休正選陣容，收起雲迪雲、蘇蘭基等主力，但整體實力仍然凌駕匈牙利球隊費倫斯華路士，上半場23分鐘，由中場柏比沙亞近門射入打開紀錄。比賽末段，比蘭莊臣射成2比0，呢位23歲威爾斯國腳近5場比賽，都各有1球進帳，腳風非常順。

至於費倫斯華路士喺90分鐘追番1球，但為時已晚，無阻熱刺喺歐霸盃2戰2勝，包括英超及英聯盃在內，更加錄得5連勝，為周日(6日)晚英超作客白禮頓壯聲威。