車路士又轟4球　尼干古入波賀法國重召

近期全面翻生嘅車路士，周五(4日)凌晨歐協聯旗開得勝，就算高爾彭馬冇註冊免役，火力依然絲毫無損，主場4比2大破比甲球會真特。法國前鋒尼干古又有進帳，用今季第7球慶祝獲法國國家隊重召。

車路士繼續用「盃賽鋒線」尼干古、祖奧菲歷斯、柏度尼圖同梅迪歷擔正，上半場由連拿度維加入波領先，柏度尼圖46分鐘再入1球。真特50分鐘由渡邊剛破蛋，不過尼干古63分鐘禁區內勁射破網，為車仔穩定局面；達斯貝利賀爾70分鐘射成4比1，真特完場前追番球，仍要輸2比4。

車路士各項賽事5連勝，近4場合共攻入16球，火力相當驚人，尼干古作客「盃賽前鋒」，今季4場盃賽入6球，表現令佢獲法國國家隊重召，亦係佢自上年加盟車路士後，首度入選法國國家隊。車路士領隊馬利斯卡賽後表示：「球隊表現好好，我哋換咗好多人，但仍然睇到個風格同目標，演出同結果都令人開心。」