英格蘭公布大軍名單　拉舒福特又落選

英格蘭國家隊看守領隊卡斯利公布新一期大軍名單，曼聯前鋒拉舒福特又落選，中堅哈利馬古尼亦冇份，紅魔鬼只有中場明奈1人入選。近期狀態大勇熱刺射手蘇蘭基相隔7年，終於獲得重召，踢好波有好報。

雖然拉舒福特喺周五(4日)凌晨歐霸盃入1球及1次助攻，哈利馬古尼亦有1球進帳，但由卡斯利賽前已經公布名單，並冇參考2人今場表現。

事實上，英格蘭人才濟濟，特別係鋒線位置競爭激烈，蘇蘭基憑近4次為熱刺上陣射入3球嘅神勇表現，相隔7年重返「三獅兵團」。卡斯利大讚呢位射手：「我非常了解蘇蘭基，其實佢上次都應該入選，但因為受傷，先至冇揀佢。」

車路士翼鋒馬杜基亦榜上有名，加上哈利卡尼、布卡約沙卡、安東尼哥頓、奧尼屈堅斯等進攻猛將，拉舒福特想爭入國家隊，並唔容易。英格蘭將於10月11日凌晨歐國聯主場對希臘，3日之後作客芬蘭。