祖記中堅重傷提早收咧　急斟拉莫斯

祖雲達斯中堅基爾臣比爾馬喺上場歐聯對RB萊比錫，受傷退下火線，事後證實呢位巴西國腳左膝十字韌帶嚴重受傷，將缺陣今季餘下賽事。意大利《都靈體育報》指祖記計劃簽入現時自由身嘅西班牙老牌中堅沙治奧拉莫斯填補空缺。

基爾臣比爾馬上仗踢到6分鐘就傷出，由費達歷高加迪入替，現時得番33歲老將丹尼路雷斯1位後備中堅，有需要簽入新中堅應急。由於轉會市場要等到明年1月先至重開，祖雲達斯只能向自由身球員埋手，沙治奧拉莫斯6月離開西維斯後，仍然未有班落，成為祖記簽入目標。

呢位38歲老將雖然已年屆退役年齡，但狀態仍然相當不俗，上季為西維爾上陣37場，合共3,301分鐘，並射入7球，可以話係老而彌堅，相信仍然有能力應付意甲及歐聯賽事。