曼聯賽後鎖更衣室21分鐘　馬古尼「撐坦」

曼聯喺歐霸盃3比3逼和波圖後，據報全隊球員喺更衣室內反鎖21分鐘，令一眾記者同等換波衫嘅波圖球員喺場上呆等。哈利馬古尼事後透露，佢哋喺更衣室內為比賽進行檢討，更力撐坦哈格見慣風浪，識得應付外界嘅壓力。

入球功臣馬古尼解釋賽後長時間留更衣室原因：「每場比賽後都會做分析，領隊會講嘢、部份教練會講嘢、球員間亦會討論，係好正常嘅事。我參與過好多次賽後檢討，更衣室內每個人都表達自己意見，傾下點樣可以做得更好。」

對於坦哈格面對嘅下台壓力，馬古尼就回應：「老實講，我喺曼聯已經6年，知道個玩法係點，當球隊陷入低潮，球員同領隊都要承受好大壓力。坦哈格好有經驗，喺曼聯歷盡風浪，佢會識得點樣應付，效力曼聯呢種大球會必須面對。」