FIFA增設「第3個轉會窗」　得32隊有得用

國際足協周五(4日)宣布，2025年將會增加一個特別轉會窗，時間為6月1號至10號，不過呢個轉會窗只係畀有份參加世冠盃嘅32隊使用，車路士、曼城等豪門有機會率先「搶人」。

擴充後嘅全新世冠盃，會喺明年6月15日至7月13日喺美國舉行，但呢個賽期就相當尷尬，因為絕大部份球員合約都係以6月30日為界線，好似奇雲迪布尼、根度簡、莫迪歷等球星合約即將到期，意味佢哋面臨踢到賽事中間，約滿變自由身嘅情況。

有見及此，國際足協宣布新措施，喺6月1日開啟為期10日嘅「第3個轉會窗」，畀參加世冠盃嘅球隊可以提早簽新球員參賽。另外，喺6月27日至7月3日期間，亦會開放畀球會重新註冊球員或用新球員取代舊人。