港超聯　傑志迎戰港會再大開殺戒

收看直播，請按直播ICON，或按下面鏈結：

https://tv.on.cc/sportlive/　

「中銀人壽香港超級聯賽」周六（5日）尾場，由連續3場坐鎮旺角大球場的傑志，主場迎戰港會。「藍鳥」對上兩仗火力全開，狂轟14球，一眾攻擊好手腳風大順下，相信港會難以抵擋，今場隨時再大開殺戒。（港台電視32、on.cc東網周六晚上6時同步直播）

傑志剛以6比1大炒九龍城，連續兩周取得大勝，士氣正盛，當中上場交出1個助攻的林樂勤（Jordan），指自己已大致適應球隊踢法，以及教練的要求，希望今場對港會，能在進攻上貢獻更多：「今場最重要一定係唔好失波，但大家都知我最鍾意進攻，希望進攻可以參與更多，快啲攞到入波。」

另一新兵慈英（Jay），今季兩次上陣皆出任中堅，慣常踢右閘的他指問題不大，自己相當享受，盼之後能爭取更多上陣機會，繼續成長。港會開季未嘗一勝，Jay表示有留意對手比賽，有信心球隊可以全取3分：「自己認識港會好多球員，佢哋今季陣容年輕咗，同埋踢法好體力化。但我哋對上兩場踢得好好，只要大家發揮出自身水準，絕對可以控制大局。」除此之外，Jay又提到其入籍情況：「上個月前已經申請特區護照，未知要等幾耐，希望入境處睇到依篇訪問之後，可以加快進度。」

至於港會上周以0比2不敵九龍城，開季3戰全敗，敬陪末席，今場更要惡鬥近況回勇的「藍鳥」，主教練谷卓斯指對方好手如雲，苦笑道球隊只能盡力一戰：「傑志大把好波之人，尤其明加索夫、馬查度同韋頓，一旦被佢哋搵到空位，絕對要付出代價，不過我哋之前對住理文，踢落唔算太差，希望呢場踢得再好啲，盡力同傑志鍊過！」好消息是陳浩嘉、曾俊軒、韋俊軒及林澔希，早前代表港隊出戰「U20亞洲盃」外圍賽後歸隊，成為及時雨。

陳浩嘉（Yoshi）表示在「U20亞洲盃」外圍賽，曾與卡塔爾及約旦兩支強隊交手，盼接觸更高強度賽事後，以更佳狀態面對「藍鳥」：「我哋喺『U20亞盃外』對過約旦同卡塔爾，屬於節奏比較快嘅球隊，令自己嘅狀態有所提升，希望可以縮窄同傑志嘅差距。」

【兩隊預計正選陣容】

傑志

門將：1.王振鵬

後衞：12.裴栽釪 6.慈英 3.鐘樂安 11.林樂勤

中場：30.祖連奴 8.鄭展龍 20.利亞倫

前鋒：10.馬查度 9.韋頓 7.明加索夫

港會

門將：1.費查

後衞：6.李俊諺 22.比提 4.唐道碧 18.積施利

中場：11.何家智 5.峇夏比 99.陳浩嘉 13.加斯特夫

前鋒： 7.陳灝 21.林智豐