續約利物浦冇聲氣　皇馬出手斟阿諾特

利物浦今季喺施洛領導下成績突出，不過阿歷山大阿諾特嘅去留仍然係個問號，據報西甲班霸皇家馬德里已同該英格蘭國腳聯繫，希望佢明年免費加盟，至於利物浦方面，仍未有任何聲氣。

25歲嘅阿諾特同利物浦合約明年夏天完結，1月開始有權同英超以外球會斟介同簽約，著名記者Fabrizio Romano透露：「皇馬正觀察阿諾特嘅合約情況，合約2025年6月完結，目前冇任何續約談判。利物浦現階段冇打算賣走佢，阿諾特嘅意向亦不明。」西班牙《阿斯報》進一步指出，皇馬已經同阿諾特陣營進行過初步接觸，希望用佢接替丹尼爾卡華積。

阿諾特較早前表示，唔會公開交代續約情況：「我喺利物浦20年，簽過4至5份合約，冇一次唔係私底下傾成，今次都唔會例外。」除阿諾特之外，穆罕默德沙拿同華基爾雲迪積克嘅合約都係明年夏天完結，利物浦仍未有續約舉動。