審判日！曼聯高層下周二開會決定坦哈格命運

曼聯近4場比賽不勝，領隊坦哈格下台壓力愈來愈大，根據《The Athletic》爆料，以紅魔鬼2位班主祖爾格拉沙、拉特克利夫為首嘅管理層將於下周二(8日)開會，盛傳可能討論是否換帥，解僱坦哈格。

據悉今次開會人士包括聯合主席祖爾格拉沙、新股東拉特克利夫、行政總裁貝拉達、體育總監艾舒禾夫、技術總監韋確斯，換言之球會所有話事人都會出席。拉特克利夫被傳媒問到，會否炒坦哈格時，佢並冇否認呢個可能性：「我唔想答呢個問題，我喜歡坦哈格，佢係1位優秀領隊，但歸根究底，換帥並非由我1人做決定，而係曼聯管理團隊，佢哋會決定點樣處理事情，以最好方法管理球隊。」

曼聯將於周日(6日)晚英超作客阿士東維拉，據悉拉特克利夫都會入場睇波，勝負可能直接決定坦哈格去留。