港超聯　冠忠南區挫均業北區　聯賽開齋

「中銀人壽香港超級聯賽」周六（5日）在香港仔運動場舉行1場「南北之戰」，冠忠南區主場與均業北區正面交鋒。最終南區靠基斯和艾華各建一功，以2比0力挫客隊，取得今季首場聯賽勝仗。

南區派出川瀨浩太及宋柱浩鎮守中路，基斯、佐佐木周及黎格爾組成中場鐵三角，支援基哥利和李小恆攻堅，新加盟的黃浩然先列後備；北區方面，龐焯熙把守大門，肯迪及何振廷負責控制中場，羅港威、舒拉普和黃偉國擔正爭取入球。

開賽僅7分鐘，南區率先發動攻勢，李嘉耀右路傳中，基哥利頭槌攻門被龐焯熙拍出，11分鐘後，黎格爾左路傳中，李小恆射斜。34分鐘，李嘉耀左路推入中間後橫傳，惟陳潤潼禁區頂起腳偏離目標。其後佐佐木周禁區內疑似被韋健豪撞跌，球證到場邊觀看VAR後，判罰12碼，基斯42分鐘操刀射入，並到場邊高舉恩奴的球衣，聲援這名在面對傑志一役受重創的隊友，南區半場領先1比0。

主隊換邊後立即以積遜入替李小恆加強攻力，但北區到54分鐘有機會追成平手，肯迪回傳，何振廷起腳高出，60分鐘，翟廷峯左路傳中，積遜頭槌攻門被龐焯熙接實。66分鐘，黃偉國禁區頂勁射僅柱邊出界，3分鐘後，羅港威左路推大位起腳，被伍瑋謙救出。眼見客隊攻勢浪接浪，南區72分鐘調入艾華，提升反擊速度，6分鐘後，翟廷峯傳中，省中基拿美再中楣彈出。戰至81分鐘，積遜頭槌二傳，艾華門前頂成2比0，其後基哥利禁區內被費利皮爾扯衫後倒地，但球證觀看VAR未有判罰極刑，艾華補時階段亦有半單刀機會，可惜被龐焯熙救出，但無阻南區贏2比0完場，在聯賽開齋，北區則錄得4連敗。

由於艾華季前受傷，因此這名翼鋒直到今場，才首度在本季上陣，隨即攻入1球，助南區奠定勝局贏2比0，他對此非常興奮：「北區呢場踢得幾好，畀到我哋好大壓力，所以呢個入波實在太緊要啦，好開心一復出就幫球隊攞哂3分。」

南區首4場聯賽面對上季「頭4」強隊，從中取得兩場和局，獲得不少球迷稱讚，艾華有信心球隊能挑戰更高目標：「我覺得球隊嘅陣容相當唔錯，季初已經見到大家就算對住4支強隊，表現都唔太差，希望保持到呢個狀態，爭取好成績。」

至於北區已經遭遇4連敗，主教練鮑家耀則炮轟球證執法水平，認為上半場韋健豪和佐佐木周的碰撞，不應構成12碼：「我都唔知嗰球點解會咁吹，佐佐木周跑跑吓突然伸隻腳出嚟，應該調番轉吹佢對韋健豪犯規先啱，而且球證冇同我解釋過，韋健豪點解犯規，同埋今場嗰球證到場邊睇VAR，但平時又唔係個個會咁做，究竟嗰準則係點㗎？」

對於部分球員下半場出現抽筋，「鮑Sir」解釋：「『君正』（劉君正）同『阿廷』（何振廷）呢場搏得好盡，一直對南區作出壓逼，令佢哋好快就唔夠氣，但表現算係咁，希望之後贏番場攞到信心。」