穆斯亞拿受傷　無緣德甲榜首大戰

拜仁慕尼黑宣布中場主將穆斯亞拿，因為髖關節傷患問題，將缺陣周日(6日)晚德甲榜首大戰，作客第2位嘅法蘭克福。呢位21歲新星同時無法為德國出戰10月12日凌晨歐國聯作客波斯尼亞，以及3日後主場對荷蘭。

據悉穆斯亞拿上輪聯賽對利華古遜，撞傷髖關節，上場歐聯對阿士東維拉，只能後備上陣，傷勢出現惡化，教練高柏尼為安全起見，決定周日(6日)晚德甲收起佢。與此同時，穆斯亞拿亦退出德國大軍名單，希望趁國際賽空檔時間治療傷患，爭取復出踢10月20日凌晨德甲主場對史特加。

穆斯亞拿退隊之後，德國領隊拿高斯文已經補選史特加翼鋒利維寧，亦係呢位擁有加納血統嘅23歲球員首次入選德國大國腳。