曼聯邀請「細恩」執教　獲得尷尬答覆

近期頻頻傳出曼聯準備炒領隊坦哈格，根據意大利記者柏美利爆料，紅魔鬼近日曾經接觸國際米蘭教練施蒙尼恩沙基，希望佢10月中旬國際賽期間接手領軍，但被呢位48歲意大利少帥即時拒絕。

曼聯已經連續4場比賽不勝，將於周日(6日)晚英超作客對大勇嘅阿士東維拉，好可能又輸1場，令坦哈格下台危機愈來愈大。由於踢完呢場比賽後，將會展開國際賽，紅魔鬼要等到10月19日晚，先至再有比賽，屬於換帥好時機，可以畀新領隊有較多時間準備。

意大利記者柏美利透過社交網話：「曼聯近幾日邀請施蒙尼恩沙基喺國際賽期間加盟，但已經被拒絕。」事實上，今夏已傳出施蒙尼恩沙基屬於曼聯新帥人選，但會方最終同坦哈格續約，更何況現時球季已經展開，國米表現不俗，「細恩」冇理由現時跳槽，如果曼聯想請佢執教，相信最快要等到下季。