祖達射爆水晶宮　利物浦6連勝

周六(5日)英超早場，「1哥」利物浦作客1比0險勝水晶宮，各項賽事6連勝。第100次為「紅軍」上陣嘅迪亞高祖達取得「士哥」，近14次英超正選錄得8入球5助攻，睇嚟領隊施洛要多啲用佢。

利物浦今場作出多個調動，迪亞高祖達、加普、居迪斯鍾斯同森美卡斯擔正，不過開賽1分鐘幾乎畀對方偷到雞，不過尼基迪亞入波越位在先食詐胡。

水晶宮未能領先，利物浦即嚟料，9分鐘，森美卡斯左路策動攻勢，加普落底線傳中，迪亞高祖達門前撞射破網領先1比0。之後利物浦攻勢不斷，阿歷山大阿諾特右路起腳，過唔到甸恩軒達臣，迪亞高祖達另一次門前機會，但就撻晒Q斜出，完半場前水晶宮有破蛋機會，伊斯美拿沙亞單刀施射，被艾利臣比加撲出。

下半場水晶宮反壓利物浦，尼基迪亞、伊斯美拿沙亞攻門都幾乎搞掂，好在艾利臣比加冇瞌眼瞓救出，不過呢位巴西門將79分鐘傷出，改用捷克小將查路斯把關，利物浦頂到尾，全取3分。