夏維斯入波追平神紀錄　阿仙奴反勝修咸頓

英超周六晚10點場，阿仙奴主場迎戰修咸頓本為強弱懸殊，但「兵工廠」久攻不下反而先失波，幸好全隊及時瞓醒，憑夏維斯、加比爾馬天尼利及布卡約沙卡各建一功反勝3比1，夏維斯入波更追平荷蘭前鋒尹佩斯神紀錄。

阿仙奴今場起用加比爾捷西斯、史達寧、佐真奴打正選，上半場雖有攻勢但冇乜大作用，14次射門僅1次中框，被「聖人」成功悶和半場，下半場55分鐘更偷雞成功，甘馬倫阿奇攻破阿仙奴大門領先1比0。

阿仙奴先失波下終於回復水準，夏維斯接應布卡約沙卡傳送勁射死角破網，3分鐘後火速扳平，夏維斯呢個入球亦係佢連續7場主場取得入球，係酋長球場歷來第2人，對上一位達此成就係尹佩斯，該位荷蘭前鋒在2011年12月至2012年3月期間連續在酋長球場入球。

追和之後嘅阿仙奴變陣，加比爾馬天尼利落場即入波，68分鐘反超前2比1，88分鐘另一後備李安度杜沙特埋門被擋出，布卡約沙卡執雞成3比1完場。