哥頓12碼宴客累紐卡素失分　杜哥利「基昂上身」

周日(6日)凌晨英超，紐卡素作客同愛華頓踢成0比0平手，「喜鵲」今場本來有大好機會，但安東尼哥頓12碼宴客成為失分罪人。當倒戈相向嘅安東尼哥頓射失12碼後，愛華頓中場杜哥利曾向佢大叫兼跳高慶祝，重演當年基昂向雲尼斯達萊「咆吼」嘅經典一幕。

兩隊今場互有攻守，愛華頓中場杜哥利18分鐘曾經頂入，但VAR判越位在先作廢。35分鐘辛度東拿利禁區內被拉跌，紐卡素獲得12碼，但安東尼哥頓操刀被英格蘭隊友比克福特撲出，杜哥利即刻衝去向住佢大叫，又喺佢身邊跳起激動慶祝，最終兩隊互無紀錄完場。杜哥利呢次瘋狂「落井下石」，令球迷諗起2003年曼聯對阿仙奴，雲尼斯達萊12碼宴客後，被基昂當面怒吼嘅經典場面。

愛華頓門將比克福特賽後表示：「安東尼哥頓賽後問我點解會撲到，我話研究過佢最近2次都射(門將)右面，所以今次我覺得佢會射(門將)左面。個波撞中我個膝頭，安東尼哥頓射得唔係咁好，我諗佢會好失望。我覺得好開心，因為呢球係今場嘅關鍵時刻。」