曼城反勝富咸　追平隊史最長不敗紀錄

周六(5日)晚英超，曼城主場出擊，意外落後之下，憑中場高華錫大發神威，梅開二度，以3比2反勝富咸，保持連續30場聯賽不敗，追平球隊史上最長英超不敗紀錄。

曼城之前2場聯賽都和波失分，今場開波26分鐘又受打擊，被富咸中場安達斯彭利拿近門射入打開紀錄。幸好「藍月亮」迅速上力，僅過6分鐘，靠高華錫勁射入網扳平。呢位克羅地亞國腳喺下半場2分鐘，接應貝拿度施華橫傳射成2比1，加上謝利美杜古個人表演，射入世界波，即使富咸比賽末段由洛迪高梅尼斯入波追番1球，都無阻曼城全取3分。

曼城自從上年12月不敵阿士東維拉之後，就未曾再喺英超輸波，由於下場對手只係狼隊，相信「藍月亮」要刷新隊史最長英超不敗紀錄，應該冇問題。