極速75秒！賓福特再閃電開紀錄　今次贏埋

近期成為「快槍手」嘅賓福特，周六(5日)英超再次極速入波，繼之前3場聯賽都係開波1分鐘內領先後，今仗主場對狼隊開波75秒入球，最終贏5比3順利拎晒3分。

賓福特上月作客曼城，尤尼韋沙22秒先開紀錄；之後作客熱刺，就有麥比奧莫23秒入波；上場迎戰韋斯咸，麥比奧莫37秒建功。今場對狼隊雖然「大退步」，但彌敦哥連斯仍喺75秒就頂入先開紀錄，最終呢場比賽變成入球騷，賓福特兩度被追平下贏5比3，拎到近4場聯賽首勝。

連續4場聯賽早早入波，賓福特領隊法蘭克賽後講笑回應：「我哋呢個星期練擲銀仔先開波，不過基斯甸洛加特(隊長)表現麻麻，所以我哋用咗更長時間先入到波囉！」呢位丹麥領隊隨後認真回應：「獨狂嘅故事，我哋想盡快將個波送上前面，睇下可唔可以做到一個傳中或者走位，球員態度好關鍵，我哋好努力咁去準備。」