艾利臣傷勢嚴重　缺席利物浦「地獄賽程」

利物浦周六(5日)英超1比0贏水晶宮後，開季各項賽事10戰9勝，令施洛成為利物浦史上頭10場贏波最多領隊，不過巴西門將艾利臣比加喺比賽期間受傷，領隊施洛表示佢可能要等到11月尾先可以復出，錯過即將展開嘅「地獄賽程」。

利物浦開季成績突出，不過有指佢哋開季7場對手，只有賓福特(第9位)排聯賽前半版，未受到真正考驗。利物浦喺國際賽期後，將會面臨連場硬仗，到11月中另一個國際賽期前，「紅軍」喺英超要鬥車路士、阿仙奴、白禮頓同阿士東維拉，中間仲有2場歐聯對RB萊比錫同利華古遜，加多場英聯盃對白禮頓，場場難砌。

最傷嘅係，巴西門將艾利臣比加今仗疑似拉傷大腿，領隊施洛預計佢要11月國際賽後先可以回歸：「嚟緊賽程好困難，好不幸艾利臣唔會踢到，我估佢係拉傷大腿肌肉，相信要抖幾個星期。佢係利物浦必然正選，係世界最佳門將之一，受傷對佢同球隊都係一大打擊。」