謝德謙：維拉地頭出擊士氣高

阿士東維拉主場迎戰曼聯，主隊於今輪聯賽開打前排第5位，相反「紅魔鬼」排喺第13位，表現較為失色，兩軍上周中出戰完歐洲賽，相信對體能狀況有一定影響。

維拉已經近7場不敗，取得6勝1和佳績，包括上周中歐聯憑後備上陣嘅祖漢杜蘭一箭定江山，以1比0力克拜仁。主帥艾美利今場主場面對「紅魔鬼」，相信唔會放過全取3分嘅好時機，射手奧尼屈堅斯近5場入4球，配合後備奇兵祖漢杜蘭，要攻破曼聯大門相信只係時間問題，而且擊敗拜仁奪歐聯勝仗，相信大大提升球隊上下嘅信心，今場面對狀態下滑嘅曼聯，估計阻力不大。

曼聯近4場不勝，隊長般奴費南迪斯仲連續兩場做紅牌阿姑，雖然今場聯賽可以披甲上陣，不過以球隊近期防守力近2場失6球，估計今波失波都係無可避免。加上上周中出戰歐霸，比對手少一日休息時間，睇怕今場都係有心無力，面對如日方中嘅維拉，送上3分機會甚大。