雲佬一旦坐正　擔心畀人話係「二五仔」

周日晚英超曼聯作客阿士東維拉一旦落敗，盛傳領隊坦哈格將被炒魷，到時助教雲尼斯達萊就好有機會接手，出任看守領隊，據報「雲佬」對接手曼聯有所顧慮，不過唔係驚教唔掂曼聯，而係怕畀人話係「二五仔」。

「雲佬」曾於前季出任燕豪芬主教練，結果到季尾尚餘1場時辭職，原因係隊中助教及幾名資深球員，同球會高層勾結，自己被背叛而離隊，該次經歷令「雲佬」處理球隊事務非常謹慎，有自己原則。

曼聯今季由新股東拉特克利夫接手，其中一項改革係改組教練團，雲尼斯特萊獲邀重返奧脫福擔任坦哈格副手，負責訓練前鋒，佢真心想幫球隊，唔想自己被外間視為一名機會主義者。

報道指曼聯高層將會到維拉主場現場觀戰，如果曼聯輸波，高層就會喺周二開會，研究坦哈格去留、看守領隊人選，以及下任主帥誰屬事宜。