曼聯「窿對窿」悶和維拉　連續5場不勝

周日晚(6日)英超重頭戲，曼聯作客0比0悶和阿士東維拉。「紅魔鬼」眾高層到場觀戰，領隊坦哈格亦變陣博一博，可惜仍然進攻乏力，各項賽事連續5場不勝，近4次對維拉全勝攤路斷纜，聯賽7戰得8分再跌1級至14位。

曼聯今場變動主要在防線，哈利馬古尼夥拍莊尼伊雲斯正選披甲，前鋒方面海倫擔正，拉舒福特同阿歷真度加拿祖雙翼齊飛，般奴費南迪斯打甩紅牌繼續正選上陣，維拉賽事早段有中堅安斯干沙傷出，由迪亞高卡路士入替。

上場歐霸盃對波圖交出1射1傳嘅拉舒福特，今場在左路有唔少具威脅攻門，另一翼鋒阿歷真度加拿度亦有起腳機會，但都過唔到佢國家隊門將達米安馬天尼斯十指關，仲有般奴費南迪斯罰球中楣，入唔到波有啲可惜。

雙方互有攻守，戰況膠着，坦哈格下半場再變陣，哈利馬古尼傷出，換入馬菲斯迪歷特同域陀連迪路夫，其後約舒亞舒克斯、安東尼馬菲奧斯都落場，尾段連卡斯米路都有出嚟，維拉亦有祖漢杜蘭登場，最終互無紀錄，踢成「窿對窿」完場各得1分。