熱刺又玩「自爆」　半場領先2球倒輸

周日(6日)深夜英超出現戲劇性賽果，近況大勇嘅熱刺上半場領先2球優勢下，下半場卻連失3球，作客以2比3不敵白禮頓。熱刺近年往往虎頭蛇尾，導致同冠軍無緣，莫非今季又重蹈覆轍？

熱刺上輪英超大勝曼聯3比0，其後歐霸盃亦贏波，挾各項賽車5連勝強勢鬥白禮頓，上半場佔盡優勢，23分鐘由比蘭莊臣射入打開紀錄，呢位23歲威爾斯國腳連續6場有波入，跟住占士麥迪臣射成2比0，以為可以輕鬆全取3分。

不過，換邊後形勢出現大逆轉，熱刺防線失誤，被白禮頓中場明迪射入，之後佐真尼奧魯達亦建一功扳平。戰至66分鐘，33歲老將韋碧克近門頂入，奇迹反勝3比2，打破之前4場英超不勝困局。

賽後熱刺領隊普斯迪高路話今場係佢執教呢支倫敦球隊以來，最離譜嘅一場輸波：「失望、沮喪、太令人傷心，係我領軍以來最差一場比賽，我哋以為上半場已經解決對手，但下半場表現令人難以接受，我哋對自己狀態太過自信，結果付出代價。」熱刺輸波之後，排第9位。