列强缩皮专吼自由身球员 免费人才库笋货逐件数
2024年10月07日 16:02
东网电视
更多新闻短片
有多位球星现时仍然未有球会收留。
秋风起，唔单止三蛇肥，又令人谂起，冬季转会市场又好快嚟喇！当全世界节衣缩食之际，免转会费嘅自由身球员，自然成为一个唔错选择，你睇巴塞隆拿几锺意执“免费兵”就知啦！咁到底现时呢个“人才库”，有咩好嘢畀各大球会拣呢？
拿华斯宝刀未老二号龙首选
基罗拿华斯系皇家马德里2015至16年球季开始欧联3连霸嘅主要功臣，不过之后泰拔高图尔斯加盟抢走佢嘅正选，拿华斯选择离开班拿贝，转投另一豪门巴黎圣日耳门。
踢过豪门经验十足
首季加盟喺“大巴黎”，拿华斯就攞法甲同杀入欧联决赛，但命运齿轮再一次辗压呢名哥斯达黎加门将，基安卢基当拿隆马加盟PSG，引发正选争夺战，最终成为输家。于2023年1月冬季转会窗，诺定咸森林从PSG借入拿华斯，更凭佢出色嘅把关成功护级，可惜“然后就没然后”，拿华斯返回PSG，到今年夏天正式弃用成为失业大军。
曾经传出沙特嘅希拉尔有意罗致拿华斯，但被佢拒绝。今年9月有传巴塞因达史特根重创，有意搵佢顶替，但最终搵咗施捷斯尼。其实呢名37岁门将，有实力有经验，搵佢做二号门将踢吓杯赛都唔错吖。
基罗拿华斯
年龄：37岁
位置：门将
最后效力球会：诺定咸森林
曾获荣誉：西甲、法甲3次、欧联3次、欧超杯、世冠杯4次
麦迪比要克服伤病史
祖尔麦迪比曾经效力利物浦8季，协助“红军”赢尽英超、欧联等各大锦标冠军，成为“高普时代”骨干人物。呢位33岁喀麦隆中坚属于“食脑型”后卫，擅于由后场策动攻势，可惜亦系“玻璃脚”，经常受伤长抖，包括上年12月遭受膝伤，提早收咧，季尾黯然离队。
曾赢尽英超欧联锦标
以祖尔麦迪比嘅名气，理应不愁落脚地，但因为伤患纪录太“花”，导致唔少球会对佢存在戒心，即使传出可能重返母会史浩克04，但都系冇下文，随时可能提早挂靴。
祖尔麦迪比
年龄：33
位置：后卫
最后效力球会：利物浦
曾获荣誉：德国杯1次、德超杯1次、英超1次、英足杯1次、英联杯1次、社区盾1次、欧联1次、欧超杯1次
祖普莫亭戥脚好帮手
喀麦隆前锋祖普莫亭球员生涯相当“传奇”，佢并非球队第一选择，但当你想搵个球员“戥脚”，好多人都会谂起佢，例如效力巴黎圣日耳门期间，卡云尼受伤就搵佢顶上。之后拜仁想搵个前锋做罗拔利云度夫斯基后备，结果又签咗佢，仲一踢4年，到今夏约满离队回复自由身。
佢踢过PSG同拜仁，见过大场面，而且身体健康随传随到，到依家未有班落可能因为佢来头太劲，等闲球队都唔敢埋身同佢接触所致。
祖普莫亭
年龄：35岁
位置：前锋
最后效力球会：拜仁慕尼黑
曾获荣誉：3次德甲、1次世冠杯、2次德超杯、2次法甲、1次法足杯、1次法联杯
拉莫斯来头猛争住要
前西班牙队长沙治奥拉莫斯可以话系自由身球员中来头最猛一位，上季拒绝沙特巨额合约邀请重返西维尔，上阵37场并射入7球，可惜遇上球队成绩走下坡，未获欧洲赛资格今季要缩皮，沙治奥拉莫斯惟有解约离队。
不过38岁嘅佢仲未谂住挂靴，虽然暂时未有班落，但佢始终有番咁上下级数，只要条件适合，仍有大把球队想签佢，例如早前有美职球队邀请佢加盟，最近祖云达斯因为中坚基尔臣比尔马受伤，要签中坚应急，据报已经同沙治奥拉莫斯接触，嚟紧可能会喺意甲同欧联再见到佢。
沙治奥拉莫斯
年龄：38岁
位置：中坚
最后效力球会：西维尔
曾获荣誉：1次世界杯、2次欧国杯、5次西甲、4次欧联、4次世冠杯、3次欧超杯、2次西班牙杯、4次西超杯、2次法甲、1次法超杯
迪利阿里博重返拖肥
年少得志、曾经系英格兰嘅炙手可热超新星迪利阿里，当年效力热刺时与哈利卡尼非常合拍，更在2015至16、2016至17年度连续两年获得英超最佳年轻球员，甚至入选“三狮兵团”征战2016年欧国杯及2018年世杯。可惜迪利阿里之后受伤患困扰，状态大跌Watt。
直至2022年冬季转会窗终于被热刺放弃，但转投爱华顿及外借到比锡达斯都未见起色，上季约满后仲未有班落，现时只系喺爱华顿跟操及进行康复治疗，有指“拖肥”想签番佢，不过以呢位28岁中场近年嘅伤病史，福祸难料。
迪利阿里
年龄：28
位置：中场
最后效力球会：比锡达斯
曾获荣誉：/
拿菲尔仲有货巴甲啱使
西班牙名将堤亚高艾简达拿今个夏天宣布退休，不过同佢一齐出道嘅细佬拿菲尔，仍然为足球生涯最后一份重要合约而努力。31岁嘅拿菲尔7月同卡塔尔劲旅多哈艾阿拉比约满后，至今仍未落班，据报佢仲等紧一间有周详发展计划嘅球会斟介，希望再次挑战顶级赛事。
拿菲尔同哥哥一齐喺巴塞隆拿青训出身，虽然成就唔及哥哥，但亦效力过国际米兰、巴黎圣日耳门等豪门，亦曾代表巴西国家队上阵，呢位中场绝对系好波之人，而且上季喺多哈艾阿拉比上阵18场，交出5个入波同3次助攻，战斗力仍然喺度，盛传有巴甲球会对佢有兴趣，有机会重返佢嘅出生地效力。
拿菲尔
年龄：31
位置：中场
最后效力球会：多哈艾阿拉比
曾获荣誉：西甲3次、西杯5次、西超杯2次、欧联1次、欧超杯1次、世冠杯1次、法甲1次