打響第一槍！拉舒福特疑似頂撞坦哈格

曼聯上場英超對阿士東維拉，雖然打和執到1分，但領隊坦哈格下台壓力仍然未減，甚至連紅魔鬼球員都開始對佢不滿。坦哈格上場換走前鋒拉舒福特，呢位英格蘭國腳黑晒面，英國《鏡報》指佢離場時同坦哈格發生爭吵，成為隊內「反坦」第一人。

曼聯上周中歐霸盃對波圖，拉舒福特開賽20分鐘內已入1球及1次助攻，表現出色，但踢完上半場就被換走，結果由贏變和，引起輿論質疑調動安排，當時坦哈格話要福仔留力出戰維拉。

雖然拉舒福特擔任正選鬥維拉，但只係踢咗64分鐘就被換走，而且由表現長期低迷嘅安東尼馬菲奧斯入替，令球迷更加摸不着頭腦。

英國《鏡報》指拉舒福特對於再次一早被換走，感到意外，繼而產生不滿情緒，並覺得自己受到羞辱，佢離場時被影到，對住坦哈格攤開雙手講嘢，似乎好嬲對方換走佢。

事實上，自從拉舒福特今年1月因為夜蒲，缺席操練之後，就傳出佢同坦哈格不和，經過近2場換人安排，可能進一步令兩人關係惡化。