打响第一枪！拉舒福特疑似顶撞坦哈格

曼联上场英超对阿士东维拉，虽然打和执到1分，但领队坦哈格下台压力仍然未减，甚至连红魔鬼球员都开始对佢不满。坦哈格上场换走前锋拉舒福特，呢位英格兰国脚黑晒面，英国《镜报》指佢离场时同坦哈格发生争吵，成为队内“反坦”第一人。

曼联上周中欧霸杯对波图，拉舒福特开赛20分钟内已入1球及1次助攻，表现出色，但踢完上半场就被换走，结果由赢变和，引起舆论质疑调动安排，当时坦哈格话要福仔留力出战维拉。

虽然拉舒福特担任正选斗维拉，但只系踢咗64分钟就被换走，而且由表现长期低迷嘅安东尼马菲奥斯入替，令球迷更加摸不着头脑。

英国《镜报》指拉舒福特对于再次一早被换走，感到意外，继而产生不满情绪，并觉得自己受到羞辱，佢离场时被影到，对住坦哈格摊开双手讲嘢，似乎好嬲对方换走佢。

事实上，自从拉舒福特今年1月因为夜蒲，缺席操练之后，就传出佢同坦哈格不和，经过近2场换人安排，可能进一步令两人关系恶化。