朗奴高文畀面巴塞　批准法蘭基迪莊免役

荷蘭國家隊主帥朗奴高文公布出戰歐國聯嘅大軍名單，早前傷愈復出嘅巴塞隆拿中場法蘭基迪莊並冇入選，根據西班牙《每日體育報》爆料，朗奴高文網開一面，接受巴塞軍醫團隊要求，容許法蘭基迪莊免役，畀佢留喺球會訓練提升狀態，避免又受傷。

法蘭基迪莊喺4月足踝受傷，缺陣163日，直至上輪歐聯對年青人，先至後備上陣復出，踢咗15分鐘，上場西甲只踢咗9分鐘。據悉呢位27歲中場短期內難以應付90分鐘賽事，所以巴塞軍醫團隊已為佢制定「特訓計劃」，希望趁國際賽檔期，幫助佢提升狀態，並同朗奴高文達成協議，容許法蘭基迪莊唔需要為荷蘭踢嚟緊2場歐國聯對匈牙利、德國。

朗奴高文球員時代踢過巴塞隆拿，亦執教過呢支西甲勁旅，雙方關係密切，當然願意賣人情。巴塞10月下旬惡戰連場，包括歐聯對拜仁慕尼黑、西甲對皇馬，如果法蘭基迪莊可以重拾最佳狀態，對於球隊爭勝大有幫助。