夏維斯「忽然受傷」　唔使踢歐國聯

阿仙奴進攻中場夏維斯上場英超表現生猛，射入1球協助兵工廠擊敗修咸頓，但現時爆出佢膝部受傷，無法為德國出戰嚟緊2場歐國聯，可以趁機休息。

夏維斯上仗踢足全場，但原來比賽過程中受傷，德國足總發表聲明，指呢位25歲球員因為膝傷問題，退出今期國家隊大軍，唔會踢10月12日凌晨歐國聯作客波斯尼亞，以及3日之後主場對荷蘭，並祝佢早日康復。

夏維斯退隊之後，德國主帥拿高斯文決定補選緬恩斯前鋒莊拿芬貝卡特，亦係呢位24歲球員首次獲得徵召。德國隊今次缺少多位主力，除咗夏維斯之外，門將達史特根、中場穆斯亞拿、前鋒富克洛都因傷無緣參賽。