減刑都冇用　祖記決定同普巴解約

祖雲達斯中場保羅普巴因為被驗出服食禁藥，遭意大利反禁藥組織Nado判罰停賽4年，經過向國際體育仲裁法庭上訴後，日前獲減刑至18個月，明年3月可以復出。不過，祖雲達斯仍然決定提早同呢位31歲法國國腳解約，佢明年1月可以自由身離隊。

保羅普巴原本合約將於2026年夏天屆滿，根據「轉會權威」記者羅曼諾(Fabrizio Romano)爆料，祖雲達斯同普巴近日已經達成協議，雙方都同意提早解約。

事實上，祖記自從保羅普巴被判罪成後，已經打算放棄佢，今季更將佢件10號球衣交畀新星基倫耶迪斯。普巴亦自知留隊冇運行，解約對於雙方都有好處。

據悉保羅普巴將會同法國國家隊主帥迪甘斯見面，表達仍然希望為法國出戰2026年世界盃，佢現時最重要工作係搵新球會收留，曾經傳出普巴可能去美職搵食。