叫黃喜燦做成龍　科木球員被重罰停賽10場

英超球會狼隊今年7月同意甲科木踢熱身賽，南韓前鋒黃喜燦報稱受到對手種族歧視，因科木球員馬高古圖曾講「佢當自己係成龍」。南韓足總作出投訴後，國際足協周二(8日)宣布重罰馬高古圖停賽10場。

逐場季前熱身賽，踢到下半場中段爆發衝突，黃喜燦投訴被對手種族歧視，科木賽後發聲明解釋，指馬高古圖承認講過「佢當自己係成龍(Jackie Chan)」，但呢句話係源自黃喜燦(Hwang Hee-Chan)嘅花名「Channy」，當中冇任何貶義或侮辱成份。

南韓足總提出投訴後，國際足協判馬高古圖種族歧視罪成停賽10場，當中5場獲得緩刑2年，25歲嘅馬高古圖同時要進行社會服務，以及要上堂接受歧視問題相關教育。狼隊總監韋爾特對判決表示歡迎：「呢次判罰發出好清晰嘅訊號，足球場對種族歧視係零容忍，亦見到國際足協打擊種族歧視嘅決心。」