曼城反告賽會勝訴　英超分裂成兩大陣營

曼城周一（7日）官方宣布，反告英超賽會APT（相關公司交易）一案中勝訴，為稍後審判嘅「115條」財務違規案打下根基，但同時令英超分裂成兩大陣營。

今次官司法律條文相當複雜，簡單而言，就係曼城被控「115條」財務違規之後，曼城反告英超賽會嘅「相關公司交易」條例唔公平，法庭判曼城勝訴，但法庭又同時認為英超賽會設立ATP冇錯，但有改善空間。

所謂APT（相關公司交易），有一種觸釋係話，球隊董事贊助返自己球隊，或者向球隊提供免息貸款。英超賽會設立各種限制，例如英超賽會禁止幾間阿聯酋公司大額贊助曼城，若果嚴格執行，車路士、紐卡素等隊都會違規，因此有部分英超球隊支持曼城。

至於曼聯、利物浦、阿仙奴等隊就係另一陣營，佢哋支持英超賽會，甚至出庭提供不利曼城嘅證據，如今曼城勝訴，勢必令英超球隊對立更加激烈。