曼聯衰運未完　馬古尼受傷「抖數星期」

連續5場賽事不勝嘅曼聯，黑氣似乎未有完結迹象，啱啱重獲正選嘅中堅哈利馬古尼，上場聯賽對阿士東維拉傷出後，周二(8日)宣布將要養傷「數個星期」，曼聯今個月嘅生死戰未能候命。

馬古尼今季被馬菲斯迪歷特搶走正選，不過近期用表現重獲領隊坦哈格歡心，歐霸盃對波圖補時入救命波後，上場聯賽對維拉復任正選，不過踢半場就疑似拉傷肌肉退下火線。

呢位英格蘭國腳喺社交網表示：「上場聯賽受傷令人沮喪，我將會缺陣數個星期，不過我會以更強大姿態回歸。」曼聯未來3場聯賽對手係賓福特、韋斯咸同車路士，喺歐霸盃亦要作客費倫巴治。

曼聯中堅人手充足，依家仍有馬菲斯迪歷特、莊尼伊雲斯、利辛度馬天尼斯同域陀連迪路夫，而法國新兵約羅據報亦接近康復。